නායකත්ව පුහුණු වැඩසටහන් පිළියෙළ කිරිම.

You are here

සේවා

සාමනේර භික්ෂු ආකල්ප ප්‍රවර්ධන වැඩසටහන.

 වියැකී යන සංඝ සමාජය තවදුරටත් රැකගැනීමේ ජනාධිපතිතුමාගේ සංකල්පය දිරි ගැන්වීමේ අදහසින් මාතර දිස්ත්‍රික් ලේකම් කාර්යාලයේ සමායෝජක ස්වාමීන් වහන්සේලාගේ හා ශාසනාරක්ෂක බලමණ්ඩලවල ගරු ලේඛකාධිකාරී ස්වාමීන් වහන්සේලාගේ මඟපෙන්වීම හා අනුශාසකත්වය මත මාතර දිස්ත්‍රික්කයේ ශාසනාරක්ෂක බලමණ්ඩල ආවරණය වන පරිදි සාමනේර භික්ෂුන් වහන්සේලාගේ ආකල්ප ප්‍රවර්ධනය කිරිමේ අපේක්ෂාවෙන් වැඩමුළු කිහිපයක් සමාලෝචිත කාලපරිච්ඡේදය තුළ පවත්වන ලදී. මෙම වැඩසටහන ක්‍රියාත්මක කිරිමට අවශ්‍ය ලිපිද්‍රව්‍ය, තේ සඳහා අවශ්‍ය ද්‍රව්‍ය, සාමනේර දහම් අත්පොත් හා ප්‍රවාහන පහසුකම් සපයා දෙන ලද අතර වියැකී යන භීක්ෂු ශාසනයේ අභිවෘද්ධිය පිණිස මෙම කාර්යභාරය සඳහා අවශ්‍ය ප්‍රතිපාදන සලසාදීම සිදුකරන ලදී.

 මීට අමතරව අන්තර් පාරිවේනික භාෂා හා සාහිත්‍ය තරඟයට ආධාර උපකාර කිරිම ද අදාළ කාලපරිච්ඡේදය තුළ සිදුකරන ලදී.

බොදු ආකල්ප සංවර්ධනය කිරීමේ ගුවන් විදුලි වැඩසටහන - අසපුව.

 මාතර බෝධි ආරක්ෂක සභාව මගින් බොදු ආකල්ප සංවර්ධනය කිරීමේ ගුවන් විදුලි වැඩ සටහන් රුහුණු සේවය මගින් පිළියෙළ කරන ලද අතර එම ’අසපුව' වැඩසටහන බොදු ජනතාවට ශ්‍රවණය කිරීමට සැලැස්වීමෙන් බුදු දහමට අදාළ වන දහම් පැන පිළිබඳව පිළිතුරු විද්වත් ධර්මධර භික්ෂූන් වහන්සේලා ලවා මෙහෙයවීමට ද කටයුතු යොදන ලදී. මෙම වැඩසටහන මගින් පසුගිය වකවානුව තුල බෝධි ආරක්ෂක සභාවට විශාල ප්‍රසිද්ධියක් ලැබුණු අතර එමගින් බෝධි ආරක්ෂක සභාව මගින් දියත් කරනු ලබන විවිධ මානුෂීය මෙහෙවරයන් වෙනුවෙන් මහජන ආධාර බහුල වශයෙන් ගලා ඒම ද සිදු විය.

 ’සසුන' භික්ෂු නායකත්ව පුහුණු වැඩසටහන.

 පේරාදෙණිය මහපොළ භික්ෂු අධ්‍යාපන ආයතනය මගින් මාතර දිස්ත්‍රික්කයේ වැඩ වාසය කරන විහාරාධිපති ස්වාමීන් වහන්සේලා 100 නමකගේ සහභාගීත්වයෙන් 2010.04.03 වැනි දින ’සසුන' භික්ෂු නායකත්ව වැඩසටහන සමාලෝචිත කාලපරිච්ඡේදය තුල ක්‍රියාත්මක කරන ලද අතර මෙම වැඩසටහනට සහභාගී වූ භික්ෂූන් වහන්සේලා වෙනුවෙන් දානමය කටයුතු සඳහා අවශ්‍ය ප්‍රතිපාදන බෝධි ආරක්ෂක සභාව මගින් ලබා දීමට කටයුතු කරන ලදී.  

යොවුන් සදහම් වැඩසටහනක් පැවැත්වීම.

තරුණ පරපුර සහභාගී කරවා ගෙන ඔවුන්ගේ ජීවිතය තුළට බුදු සමිඳූන් වදාළ උතුම් ධර්මය ශ්‍රවණය කරන්නට හා ධර්මය පුරුදු කරන්නට සුදුසු යොවුන් සදහම් වැඩසටහනක් පැවැත්වීම සම්බන්ධයෙන් කරන ලද ඉල්ලීමට අනුකූලව අදාළ සදහම් වැඩසටහන පැවැත්වීමට කටයුතු පිළියෙල කර දෙන ලදී.

ශිෂ්‍ය නායක වැඩමුළුව.

මාතර දිස්ත්‍රික්කයේ සියලුම දහම් පාසල්වල ශිෂ්‍ය නායකයන් හා ශිෂ්‍ය නායිකාවන් සහභාගී කරවා ගෙන ’2600 සම්බුද්ධ ජයන්තිය වෙනුවෙන් දහම් පාසලේ කාර්යභාරය'යන මාතෘකාව යටතේ 2010.04.04 දින ශිෂ්‍ය ශිෂ්‍යාවන් දැනුවත් කිරීමේ වැඩසටහනක් දිස්ත්‍රික් ලේකම් කාර්යාලයේ මගපෙන්වීම මත ශාන්ත තෝමස් කුමර විදුහලේ දී පවත්වන ලද අතර එම වැඩසටහනට සහභාගී වූ දහම් පාසල් සිසු දරු දැරියන් 500 දෙනෙකුට අවශ්‍ය උදෑසන ආහාරය ලබා දීමට ද කටයුතු කරන ලදී. 

සියඹලාණ්ඩුව කොට්ඨාශයේ සිරි විජිතාරාම විහාරයේ සාමණේර අධ්‍යාපනය.

ශ්‍රී ලංකාවේ අති දුෂ්කර ප්‍රදේශයක් වන සියඹලාණ්ඩුව කොට්ඨාශයට අයත් සිරි විජිතාරාම විහාරයේ සාමණේර ස්වාමීන් වහන්සේලාගේ අධ්‍යාපනික දියුණුව උදෙසා විශේෂයෙන් ඉංගී‍්‍රසි හා දෙමළ බසින් ධර්මය ප්‍රචාරය කිරීමට හැකිවන සේ උන්වහන්සේලාට ඉංග්‍රීසි හා දෙමළ බස ප්‍රගුණ කිරීමේ වටිනාකම මත මෙම ඉගැන්වීම් කටයුතු නිරත වන ගුරුතුමන්ලාට මාසිකව රු. 3,000/= බැගින් මාස 12 ක කාලපරිච්ඡේදයකට ලබා දීමට සමාලෝචිත කාලපරිච්ඡේදය තුළ කටයුතු කරන ලදී. 

පිණ්ඩපාත චාරිකා - ශ්‍රී රෝහණ තරුණ භික්ෂු සංවිධානය.

 මාතර කොටුවේගොඩ රන් දූපත උපෝසථ මහා විහාරයේ ශ්‍රී රෝහණ තරුණ භික්ෂු සංවිධානය පූජ්‍ය හත්තොටුවේ ඉන්දරතන ස්වාමීන් වහන්සේගේ මෙහෙයවීම මත සිදු කරනු ලැබූ පිණ්ඩපාත චාරිකාව සඳහා අවශ්‍ය මුල්‍ය අනුග්‍රහය බෝධි ආරක්ෂක සභාව මගින් ලබා දීමට කටයුතු කරන ලදි.

  

පුණ්‍යානුමෝදනාව

බෝමළුවේ පැවැත්වෙන ධර්ම දේශනාමය හා මහා බෝධි පූජාමය පිංකම් වලට මෙන්ම වසරක් පාසා ජනවාරි 01 දින පැවැත්වෙන හීල් දානමය පිංකමටද සහභාගී වන මාතර නගරයේ හා අවට විහාර හා පිරිවෙන් විද්‍යායතන වලින් වැඩම කරන නායක, අනුනායක හා අනෙකුත් මහා සංඝරත්නය නමස්කාර පූර්වකව ගෞරවයෙන් සිහිපත් කරමු.

බෝධි ආරක්ෂක සභාවේ දානමය පිංකම් වලදී අවශ්‍ය මේස පුටු හා පිඟන් කෝප්ප ආදිය නොමිලයේ සැපයීමෙන් මාතර ගබඩා වීදියේ ධර්මදාස ස්ටෝර්ස් අධිපති අප ගරු සාමාජික සරත් හේවා පතිරණ මහතා හා පරිත්‍රාන ධර්ම දේශනාවලදී නොමිලයේ පිරිත් මණ්ඩප හා ආසන ලබා දෙමුන් සී.ඒ. නදුන් නිරෝෂන් මහතා විසින් සිදු කරන සේවය සෑම වසරකදීම නොමසුරුව මෙම සභාව වෙත ලබා දීමෙන් සිදු කරගත් පුණ්‍ය කර්මය කෘතඥතා පූර්වකව සඳහන් කරමු. එතුමන්ලාගේ සියලු ව්‍යාපාර කටයුතු තවදුරටත් දියුණුවට පත්වේවායි ද එතුමන්ලා ඇතුළු පවුලේ සැමට දීර්ඝායුෂ ලැබේවායි ද ආශිර්වාද කරමු.

අප සභාවේ පරලෝ සැපත් පෙර සභාපතිතුමන්ලාට ද සියලුම ගරු සාමාජික මහත්වරුන්ට ද කෘතවේදීව පිං අනුමෝදන් කරමු.

මෙම සිද්ධස්ථානයේ නානාවිධ පූජෝපාහාර පැවැත්වීමෙන් හා විවිධ පූජා භාණ්ඩ පරිත්‍යාග කිරීමෙන් ද මුදල් ආධාර පිරිනැමීමෙන් ද සහයෝගය දුන් සැමට ත්‍රිවිධ රත්නයේ පිහිට හා මාතර ඓතිහාසික බෝ සම්ඳූන් අධිගෘහිත සියලු දෙවියන්ගේ ආශිර්වාදය ලැබී සුඛිත මුදිත වේවායි ප්‍රාර්ථනා කරමුන් පිං අනුමෝදන් කරමු.

මෙම පූජා භූමියේ ආරක්ෂාව සම්බන්ධයෙන් ඉතා උනන්දුවෙන් ක්‍රියා කරන නියෝජ්‍ය පොලිස්පතිතුමා සහ මාතර පොලිසියේ සහකාර පොලිස් අධිකාරී හා මූලස්ථාන පොලිස් පරීඏකතුමා ඇතුළු සියලුම පොලිස් නිලධාරීන්ට ප්‍රශංසාත්මකව පිං දෙමු.

බෝධි ආරක්ෂක සභාවේ වැඩ කටයුතු වලදී විවිධ අයුරින් උදව් උපකාර කළ දිස්ත්‍රික් ලේකම්තුමිය, අතිරේක දිසාපතිතුමා, ප්‍රාදේශීය ලේකම්තුමා ඇතුළු රාජ්‍ය හා පළාත් පාලන ආයතනවල සියලුම නිලධාරීන්ට, සියලුම සංස්ථා හා ව්‍යවස්ථාපිත මණ්ඩලවල සේවයේ නියුතු සැමටත්, ලංකා බැංකුව අධි ශ්‍රේණි ශාඛාවේ කළමනාකාර තුමිය ඇතුළු සියළුම කාර්යය මණ්ඩලයටත්, මාතර මහ රෝහලේ වෛද්‍ය අධිකාරීතුමිය, පෙර අධිකාරීතුමා ඇතුළු සමස්ථ කාර්ය මණ්ඩලයටත් මාතර මහ රෝහලේ ඉදිකරනු ලබන ගොඩනැගිලි අධීඏණය කරමුන් නොමිලයේ තම සේවාව ලබාදුන් ගෙඩනැගිලි දෙපාර්තමේන්තුවේ ප්‍රධාන ගොඩනැගිලි ඉංජිනේරු මහත්මියටත් අතපසුවීමකින් හෝ අමතක වීමකින් හෝ මෙහි සඳහන් නොවන සියලුම දෙනාටත් තුණුරුවන් පෙරටු කොට සියලු දෙවියන්ගේ දේවාශිර්වාදය ලැබේවායී ප්‍රාර්ථනා කරමුන් ස්තුති පූර්වකව පිං දෙමු.

අප සභාව මගින් සිදුකරන සියලුම යහපත් කටයුතු වලට ධෛර්ය හා නන් අයුරින් උපදෙස් දෙමුන් සාමුහිකව අපේක්ෂිත අරමුණ සාර්ථක කර ගැනීමට ඇප කැප වෙමුන් සහාය දැක්වූ සභාපතිතුමා, භාණ්ඩාගාරිකතුමා ඇතුළු ගරු සාමාජික මහතුන්ට කෘතඥතා පූර්වකව පිං දෙමු. ව්විධාකාරයෙන් බෝධි ආරක්ෂක සභාවේ සේවයේ නියුතු සමස්ථ කාර්ය මණ්ඩලය විසින් දෙන ලද අගනා සහයෝගය භක්තියෙන් හා කැපවීමෙන් කරන ලද සේවය නිසා බෝධි ආරක්ෂක සභාවේ කාර්යයන් වඩාත් පහසු වන බව කෘතඥතා පූර්වකව සඳහන් කරන අතර ඔවුන් සියලු දෙනාටම ස්තුතිවන්ත වෙමු.

ඉහත සඳහන් පරිදි වෙන් වෙන් වශයෙන් සඳහන් නොකළත් මෙම ස්ථානයේ බෝධි ආරක්ෂක සභාවේ කටයුතු ඇසුරින් තම සිතුවිලි යහමගට යොමු කරන්නා වූ සියලුම පිංවතුන්ට ආශිර්වාද පූර්වකව පිං දෙමින් සියලු දෙනාගේ අභිප්‍රායයන් සාර්ථක වේවායි පතමු.

දැක්ම

ආගමික අධ්‍යාපන, සංස්කෘතික හා සමාජයීය ව්‍යාපෘතීන් හරහා පොදුජන මෙහෙවරක නිරතවීම

අප හා එක්වන්න

  • බෝධි ආරක්ෂක සභාව, ධර්මපාල ම‍ාවත, මාතර, ශ්‍රී ලංකාව
  • Phone: +94 41 222 2983
  • Email: i[email protected] 

තොරතුරු ලිපි

මාතර බෝධි ආරක්ෂක සභාවේ නවතම එමෙන්ම විශේෂ පුවත්වලින් සැනෙකින් දැනුවත්වීමට ලියාපදිංචි වන්න.